ERRRRRRCH

'Kijk jij nog wel eens op de blogs", de wize wêrop hy dat sei liet my in bytsje skrikke.
Mar ik moat earlik bekenne, Robert en oare dierere kollega's, dat ik simmers in oar minske bin. Dan sjoch ik jûns let heechút myn mails; achter de pc of televyzje sjen, nee. Ik kom der net ta, dat helje ik 's winters wol wer yn.
Ha wol de blogs even bylâns west; en gean nei de simmer wer meidwaan, as Annelies, Robert en noch in pear die-hards de moed dan net opjûn ha.
Dan skriuw ik wol oer Henk dy't mei pensjoen is, de reünie fan de bibliobussen, Jozien dy't op Oerol oan'e rosé siet en dat hast lekker begûn te finen, nije dingen op Google (grapke), fekânsje perikelen, klanten dy't net lêze wolle oer twa kear seks op in dei ensfh.

Oerol

Fannejûn drok dwaande west mei it bestellen fan kaarten. Foar my de earste kear dat ik it op deze wize doch. Oant no ta sieten Tjits, Janny, Tjaart of ik elke moarn, by toerbeurt, ier en betiid- soms al om in oere as seis- yn de rij foar kaarten. Foar guon minsken in reden om noait wer nei Oerol te gean; dy healwizerij. Wy fine it elke kear ek wol wer in belevenis, je laitsje je dêr soms slop om de gekke minsken en de prachtige gesprekken mei dyselde minsken.

In hele protte kaarten binne ek no by it ynternetbestellen al op, dus dat wurdt toch wer gean foar de deikaarten en dus wer yn de rij. Mar sa'k al sei, ék dat is Oerol.

Dien

Tongersdei 14 maaie.
Foar de lêste kear wurdt de jûn te foaren de bôle smard, de tas klearsetten, de wurklean dellein. Moarns om 2.00 oere giet de wekker. Middeis komt er thús. Mei in bosk blommen fan in klant. Op syn wurk sels is der gjin inkele oandacht oan bestege, offisjeel giet Henk der pas op 1 juny út, dus miskien komt dat noch. Mar it soe my net ferbaze as dat net gebeurt. Dat is sa't it giet as je as wurknimmer fan it iene bedriuw nei it oare, en dan wer nei in oar geane. Al dy oernames binne funest foar de bining mei je wurk. Mar hoe dan ek, Henk hat 'm wol hast 40 jier te pletter wurke, sûnder ek mar mear as in wike siik west te hawwen.
Doe't er thúskaam middeis hat er earst syn wurkjas trochmidden knipt. Koen lei yn in deuk.
De jonges en ik hiene moarns al in kadootsje klearlein en syn tromke fersierd.

Henk kin trouwens in boek, of in blog, skriuwe oer alle akkefysjes dy´t er yn de rin fan de jierren meimakke hat. Hast 40 jier mei hieltyd gruttere kombinaasjes op de dyk nei plakken dy´t , je wurde der as beropssjauffeur gek fan, hast allegearre ien, twa of mear rotondes krigen ha... Brek him de bek net iepen.

Fan de dyk rekke yn novimber 1985

Fan ballonnen en kaartsjes opstjoeren...

Se treffe it mar, de bern dy't earne yn it lân in ballon op litte fan wat foar feest of fiering dan ek en dat dy ballon dan fûn wurdt troch Henk.
Henk sjocht safolle nuvere dingen as wy oan it rinnen binne. ' t Sil syn aaisikersblik wol wêze, mar ek juster wie it wer raak. Yn in skitterend natuergebiet by Diever - achterôf die bliken dat wy yn ferbean gebiet rûnen, echt wier, we wiene ús dat net bewust- fûn er foar de safolste kear wer in oan flarden reage ballon mei in kaartsje deroan. En fansels it fersyk om dit kaartsje asjeblyft wer werom te stjoeren.

Jûns yn de kamper de kaart derby, de wynrjochting bepaald, en in grut tal kilometers derby smokkele yn de hoop dat 'syn' berntsje ( út Markelo) mei in moaie priis nei hûs giet.

Yn dit gefal wie it fynplak Diever mar skreau er sakrek thús Eastermar op. De envelop is al poste , dus ik kin der neat mear oan feroarje.

Stoke

Fannejûn foar it earst wer myn kacheltsje brûkt. En dat nei in dei dat de hagelstiennen my om de earen fleinen.
Stoke; ik wenje mei trije mannen dy't à, net bûten ite wolle en b, jûns ek yn de hûs bliuwe. Foar my ûnbegryplik, want ik sit altyd bûten. Neffens hun op it oerdreaune ôf. Ha se ek wol in bytsje gelyk yn.
Likegoed, wat in moaie simmer stiet my wer te wachtsjen. As it in bytsje kin stook ik op in jûn, as de wyn geunstich is, dat wol sizze, as de buorlju net al te folle lêst fan my krije, in jiske-amer fol houtsjes yn myn, fan in ekspânsjefet makke, kacheltsje.
En wat doch ik dan op sa'n jûn; neat! Ik sit stomwei nei it fjûr te sjen, net mear, net minder.
Allinnich ien ding. Sa as ik doetiids doe't ik noch rookte beslist in sigaret moast as de telefoan gie en mear as ien as it geprek langer duorre, sa moat ik no in fles wyn iepenje en opdrinke as ik myn kachel oanstek. Gelokkich stiet de glêsbak 30 m fjirder...
Is dit miskien 'illegaal stoken' púr sang?

Bestekbak en miggeklappers

Al tiden is myn bestekbak fan de ôfwasmasine stikken, heel yrritant. De leppels, foarken, messen stekke troch de ûnderkant hinne. Dat hat ta gefolgen dat je de masine amper iepen / ticht dwaan kinne. It krast en it docht, en ik kras en doch net minder.

Hie al op ynternet sjoen dat in nije bestekbak hast like djoer is as de masine sels; de ôfsetters.

Twa pakken fan 3 miggeklappers fan de action ( € 0,37 it pak) bringe útkomst.

Ha'k op maat knipt en dy hâlde no al myn bestek prima op syn plak!

Guozzen

Noch nea earder sa moai sjoen.
Wy wiene de peaskedagen op Terskelling om de karavan fan myn skoanmem skjin te meitsjen. Bin we in pear oeren mei dwaande-wit Jozien alles fan, dy is ek wolris mei west en heel goed yn daksgoaten reagjen!- mar dêrnei ha we de tiid oan ússels en kin we mar genietsje op dit prachtige eilân. Dit guozzepear mei seis giele jonkjes fytsten we sawat oer hinne.

't Lêste ding

Weromsjend skrik ik dan toch even dat ik safolle alwer kwytrekke bin. It is foar my gjin dagelikse kost, dit dwaande wêzen mei sosjale netwurken op ynternet en dat wurdt it nei deze kursus ek net.
As it doel wie: it priuwen fan allerhande nije ynternetfunksjes, dan is wat my oanbelanget deze kursus mear dan slagge.
Mar....
Hoe gean wy dit allegearre byhâlden, we kinne it ús oan de iene kant net permitearje om net up-to-date te bliuwen, oan de oare kant hoecht net elkenien alles te witten. It is gjin raar idee om hjir in spesjalisme foar yn it libben te roppen, moat der wol formaasje foar regele wurde, want dat is wol wat my en ekenien dúdlik wurden is deze ôfrûne moannen, it nimt in hele protte tiid!
Foar de bibleteek sjoch ik wol in mooglikheid om fia ús webside mear ynteraktyf mei de lêzer/ gebrûker dêrfan om te gean.
Miskien binne der genôch klanten dy't graach wat dele wolle oer boeken dy't se lêzen ha, dan komme we wer werom by de aquabrouwser en hoe dy goed op de kaart te setten.

Iksels bin der wiis mei dat ik 23dingd ha, fûn dat de kursus goed yn ynelkoar stuts- hie allinnich wol earder fan Last fm witte wollen! ( Komt no krekt Sugar me fan Linsey de Paul foarby)
Mar ik bin sowieso bliid dat ik troch myn wurk dwongen wurd myn blikfjild te ferromjen.

Der wie/is praat fan dat ek alle oare kollega's deze kursus noch folgje moatte. Dêr ha ik wol myn betinkingen by. Want litte wy op de evaluaasje mei inoar earst mar ris besjen wat foar de bibleteken no echt relevant is. En dan dat oanbiede yn in ferkoarte kursus?

It hat in protte tiid koste; elke kear naam ik my wer foar om even ien of twa oerkes dwaande te gean, mar ferfolgens siet ik faak ta de nacht út.
Hat ek te krijen mei it lêzen fan de blogs fan kollega's. En dat is al faker sein, dat is dochs wol ien fan de alleraardigste fasetten. Moaie , ûntroerende, grappige, skokkende, gewoane en ûngewoane ferhalen lêzen. Wat bin ik sa wat gewaar wurden, ek fan dy kollega's dyt net meidiene; dat seit ek wat.
Ik wol by deze Robert en Annelies tank sizze foar hun tips en trucs. Heel noflik om op jim weromfalle te kinnen. Jim joegen beide it idee dat jim der plezier yn hiene om deze nerd in eintsje op wei te helpen!
En ik fûn it heel bysûnder dat Nynke alles meidien hat, dan bin je ien mei je persoaniel.

Ik ha myn nocht

Net fan it bloggen, mar no't de maaitiid yn'e loft sit, de blomkes hun kop boppe de grûn stekke, fûgels my wekker fluitsje, de earste neven wer rûn de ruten gûnzje, myn mannen wer begjinne te prústen, de reisgidsen út de kast komme en de kamper simmerklear makke wurdt....

no bin ik hast wol klear mei de 23-dingen. Letterlik en figuerlik, want ik hoech noch mar 1!

Ald en nij, mar dan oars

Fannemiddei mar achter de pc, juster myn gips derôf krigen en de opdracht om myn foet noch twa dagen minimaal te brûken. Jûn gean ik dan wol nei it wurk, 't is mar twa oeren en noait sa drok. Lekker idee dat je wer autoride kinne en dus eigen baas wer binne!

Wêr't ik deze kursus allegearre wol net lid fan wurden bin....

Nr 7 út it manifest: ik gooi oudere werkwijzen overboord als er betere zijn; ook al leken die oude werkwijzen ooit fantastisch. Seach op de blogs fan Annelies en Nynke, dat sy de âlde katalogusbakken- de oudere werkwijzen-net helendal oerboard goaid ha. Ik ek net.

De powerpoint fan Wowter besjoen, artikelen lêzen. Bibliotheek 2.0 liket de bibleteek wol in stik dynamysker te meitsjen. De bibleteek fan de takomst? As je nije doelgroepen oansprekke wolle, seker. In firtueel plak dêr't elk elkenien treffe kin.

My Discoveries

Fannemiddei mei Robert oan it prebearjen west hoe't we dit tapasse kinne foar úsself, mar benammen foar ús klanten. Dus ha ik ek my oanmeld by My Discoveries yn ús eigen BSF-aquabrowser en wat titels (*) yn myn list setten. Stjerren en tags takend. Wy giene derfan út dat wy elkoars keuzes sjen soene, nee dus.
(*) Even oefene mei de titels fan Fred Vargas, bin ik al jierren 'fan' fan.

Robert joech 5 stjerren oan 'de omgekeerde man', ik 3. Gemiddeld is dat 4, toch? Ik sjoch allinnich myn stjerren werom yn de katalogus, net dy fan Robert, of oaren dy't ek stjerren takend ha.
We sille der fannewike noch ris mei los.
Wordt vervolgd!

Sykje de twaling

Sosjaal netwurkje op in moaie sneintemiddei.
Jozien belle krekt oer de OR gearkomste fan moarn, ik ha mei myn freondinnen Oerol regele, fannemoarn mei soannen en skoandochters ûntbijten, koart sein al aardich oan de opdracht foldien.
Dan ha ik my wer opnij oanmelden by Schoolbank.nl. Yn jierren net op sjoen, wie myn ynlochkoade kwyt. Mar wol wer leuk, hear.
Hyves kin ik fan myn bern. Foarige wike hyvde in lyts nichtsje noch nei Koen of hy ek vriend fan har wurde woe. Hy fûn it genôch om har neef te wêzen, sei er, mar doarde har net ôf te wizen.
De oare netwurken ynmiddels allegearre bylâns west en sa by http://www.dizzie.nl/ in skoalfreondin tsjinkommen fan de BDA. Ha ik al in mailtsje stjoerd. Tafallich, want ik hie ek al om har socht op Schoolbank.
http://www.dizzie.nl/ liket in protte op LibraryThing, mei dat ferskil dat je noch freonen tafoegje kinne.
Miskien kinnne we klanten ris op deze sites wize yn in Nijsbrief?

Last. fm
Henk hat my moannen lyn alles nei boppe roppen, wat er NO fûn hie? Helendal geweldich! Dat wie dus Last.fm.
Ik ha no ek foar mysels in account oanmakke, ha al wat musyk belústere. Ik begryp dat je fia de radiofunksje net nei musyk fan de dyselde artyst lústerje kinne. Dan moat je beteljend lid wurde? Je kinne troch op dy artyst te klikken wol koarte fragmenten hearre.
Mar kom hjir no hast net wei mei de '70 radio; helemaal myn jierren en musyk. Hearlik!
http://www.last.fm/listen/globaltags/70s

Mei pensjoen

Krekt werom fan de foarstelling dy't Klaasje Postma makket mei Hans Man in't Veld.

Wat bart der tusken minsken as ien fan de twa mei pensjoen giet, as je fanôf dan tegearre thús binne. Hoe jouwe je in draai oan deze nije libbensfase? Fyn je elkoar of ferlieze je elkoar dan krekt. Ensfh, ensfh.

Klaasje en Hans kenne deze situaasje út eigen ûnderfining en binne al tiden dwaande om ymprovisearjend dêr in goed oere duorjende foarstelling fan te meitsjen. Ynmiddels binne se safier dat se der graach publyk by ha wolle, reaksjes hearre wolle, ûndúdlikheden boppe tafel krije moatte. Foarige wike tiisdei wie ik der ek te sjen ( yn it Posthûs fan Hearrefean) en is der yn it neipetear in hele protte oandroegen. Ferrassend om dit proses te folgjen, hjoed wie it sa'n stik fierder, strakker spile. Oare wike jouwe se noch in pear foarpremiêres en dan is it de bedoeling dat se yn septimber hjirmei de boer opgeane.

Ik kin my der fêst op tariede, want Henk giet yn juny mei prépensjoen. En ik herken helendal de skrik as ik der oantink dat hy aanst altyd thús is, dat ik net mear in dei allinnich thús bin. Ik ha him ek al tich kear sein, dat my dat oangriist en of hy der wol foar soargje wol dat er wat siket op dy dagen en dan is even nei Ljouwert om boadskippen net genôch..... No ja sa sitte wy dan wat te jeuzeljen.

Ik blog jim op de hichte hoe't dit by ús gean sil!

Boekekasten

http://www.librarything.nl/catalog/opdevlugt

Ik wol ek 'n boekekastje op myn blog. Bin ynmiddels al ynlogd, mar 't bliuwt wer stûkjen op myn ûnkunde. Kom net fierder as ien boek der op te setten. Dan wit ik al wer net hoe't ik dy der opkrigen ha.


Hoe blond kin je wêze...

No stopje ik der earst even mei, gean nei in proeffoarstelling fan Klaasje Postma, aanst mear dêr oer.

Web 2.0, wer in stap op 'e ljedder

Ik ha hjoed in 23dingen dei. Wol einliks oant en mei trede 18.

Ik wit net hoe of it jim giet, mar ik brûk de blogs fan myn kollega's hast mear as de ynstruksjes fan 23 dingen. Sa kom ik der achter wat wol of net belangryk is om te witten en wat ik wol oerslaan kin. Is fuort en daliks in reden om net te hurd te gean mei it dingen!

In aardige tip fan Nynke:

Wat vind jij?Op Watvindenwijover.nl kan je je eigen favoriete webpagina's bewaren, zodat je ze altijd en overal bij de hand hebt.

En in oar leuke wie fan Annelies: Hoedoe.nl.

Wat ha ik sels foar tip? http://www.neatfun.nl/

Deze foto is trouwens makke yn de beeldentún fan Gees; in oanrieder!http://www.beeldeningees.nl/

Pod en Tube

Hie ôfrûne wike al wat oan it snuffeljen west, of better sein oan it hearren en besjen.
Podcaste sil ik net dwaan, bin sowieso net in radiomins. Radio is foar my behang. Behalve yn de auto, dan lústerje ik echt bewust. Ik ha in pear jier lang myn soannen op snein te jûn nei Breezand brocht. Dêr giene se dan in wike bollepellen. Op de weromreis hearde ik dan op Radio 2 nei kabaretkompilaasjes. Foar't ik it wist stie ik wer op ús pleintsje! Mar om dêr op oare sneinen foar te sitten, nee dus. Soks soe ik dan podcaste kinne, ja dat soe kinne.......
You tube is in oar ferhaal. Dêr kin ik net omhinne, al is it allinnich mar om alles wat je fan elkenien tasjoerd krije.
Wy lêze de VARAgids en elke wike stean dêr aardige you-tube-tips yn.
Podcast yn de bibleteek? Ik sjoch dat net. You tube? Djûke hie dêr wol in goed idee oer; brûkt it by klassebesites. Miskien by de klassebesites filmkes meitsje en dat op You tube pleatse. Of yn de berneboekewike de studenten fan it Friesland College deze opdracht jaan?

Chatten

De earste kear dat ik meidie oan in chat wie nei ôfrin

fan de searje "de Negen dagen van de gier" mei Jan Decleir

(sa'n moaie spiler, ja ik fal op âldere mannen, ik wit it.)

Dy searje rûn sa frjemd ôf, de lêste wurden wiene noch net sein of myn suske hong al oan de telefoan. "Hè?". "Ja", sei ik "Hè?"

Je koene chatte mei akteurs, regisseur ensfh... dus meidwaan. Gjin akteur dy't antwurde op myn fragen en dy fan in hele protte oaren - krekt as wy ferbjustere troch te folle losse eintsjes- nei in ketier wie der steeds mear ûnsin en ûnbeskoftheid te lêzen.

Bin doe noch mar even nei myn suske fytst en nei allebeide in fles wyn nuttige te hawwen stiet it my by dat ek wy behoarlik ûnbeskoft waarden, behalve oer Jan Decleir.

Gips, bier en suvel

Foar de twadde kear yn 'e gipskeamer en wer mocht ik 'n kleurke kieze.
Twa wike lyn hie ik myn bril mei giele poatsjes op en doe keas ik foar giel.
Tiisdei de blauwe bril en horloage, dus fandêr deze kleur. Mar goed dat ik net elke fjirtjin dagen gips krij, want leau my, ik hie dan ek noch myn donkerreade bril meinommen. De meast bypassende kleur gips wie dan rôze west, help!
Dan wurdt it barbiegehalte wol heel heech, dy is trouwens ek al 50 ha' k begrepen. No dat bin ik noch net- sjoch kalender!

Noch even deze foto fan ûng. 6 jier lyn
De earste kear dat wy tegearre mei fekânsje wiene, hiene dy stoere jongens fan ús de noadige feestjes jûn én, dat ha se fan hun mem, dêr moat dan fuort in foto fan makke wurde. Robert hat fotoshopt en stjoerde hun deze foto ta. Wy koene der wol om laitsje-Henk helendal, dy wurket op't lêst yn 'e suvel- de mannen sels seachen de humor der net fan yn. No wol trouwens!

En no noch even 23 dingen. (Ding 13)
Ha in dokument yn google-docs makke en hoopje dat dat slagge is. Dat hear ik dan wol fan Jozien. Sy woe mei my dokke, ik no mei har.
Liket my aanst foar de OR ek wol heel makkelik.
We moatte mei de nije Or-leden mar even oant it oefenjen.
Moat lukke, want we dingje allegearre!

FEEDS >FEETS

RSS: yn myn gefal Rare Skeve Skonken

Wa wit kin ik, as ik aanst út it gips kom, sa'n foto fan myn eigen fuotten meitsje!

WIKI's

Ding 11/ 12 . De hele middag eigenlijk zoet met de wiki's..

Dat krij je as je sa sitte te surfen tusken al dy berjochtsjes fan kollega's 'uit den lande'.
Ferjit ik hast dat ik yn it Frysk oan it bloggen bin.

"Wykjes" fan Robert, Nynke, Jozien, Ingrid lêzen.
En ferjitten by myn oanfullings myn namme der ûnder te setten. Hoe slim is dat?
Ingrid, Jozien en ik dele yn elk gefal deselde hobby mei in hele protte oare kollega's op 23dingen : rinne!
Dit is it logo fan myn klupke: myn twa sussen en twa freondinnen.